Davlat soliq qo‘mitasi Toshkent viloyatining Bo‘stonliq tumanidagi dam olish maskanlarini ijaraga olish to‘g‘risida ishonchli ma’lumotlarning yangi xizmati – Yagona elektron platforma – orom.uz ni ishga tushirdi.

Uning geografik ro‘yxatida hududning eng mashhur va xushmanzara hududlari – Sijjak, Bo‘stonliq, Yusufxona, Soyliq va Do‘stlik qo‘rg‘onlari ko‘rsatilgan.

Dala hovli, dam olish uylari, yakka tartibda qurilgan uy-joylar hamda yashash uchun mo‘ljallangan boshqa turar joylar, topchanlar va suv transport vositalarini ijaraga beruvchilar xizmat ko‘rsatish uchun ro‘yxatdan o‘tadi.

Ijaraga beruvchilar ijara obyektlari haqidagi ma’lumotlarni bepul joylashtiradi. Mijozlar dam olish obyektini masofadan turib tanlashi, band qilishi va ular uchun to‘lovni amalga oshirishi mumkin. To‘lov amalga oshirilgandan so‘ng, dam oluvchining elektron pochtasiga band qilinganlik haqida xabarnoma yuboriladi.

Dam oluvchilar saytda ro‘yxatdan o‘tishlari kerak, shundan keyin obyektlarni tanlashi va band qilishi, shuningdek, ularni turli mezonlar bo‘yicha baholab, sharhlar qoldirishi mumkin.

Platformada joylashtirilgan ma’lumotlarning barchasi ishonchli. Obyektlarning orom.uz saytida mavjudligi ularning qonuniy faoliyati isbotidir!

Saytning qulay navigatsiyasi to‘liq filtrlash orqali, asosiy imtiyozlar – moliyaviy, maishiy va boshqa mezonlardan kelib chiqib, dam olish uchun mos joyni qisqa vaqt ichida topish imkonini beradi.

Ushbu xizmat Davlat soliq qo‘mitasi tomonidan mahalliy va chet ellik sayyohlar uchun Toshkent viloyati Bo‘stonliq tumanida o‘tkaziladigan soliq tajribasi doirasida ishlab chiqilgan.

Davlat soliq qo‘mitasi Vazirlar Mahkamasining 2020-yil 20-fevraldagi 107-sonli qarorini tushuntirish orqali bu haqda ma’lumot bergan edi. Hujjat iste’molchilar – insofli soliq to‘lovchilarning huquqlarini himoya qilishga qaratilgan.

Tajriba doirasida barcha ko‘char va ko‘chmas mulk obyektlari hisobga olinadi. Ularning egalariga bepul sertifikat (guvohnoma) beriladi.

Hisobga olish jarayoni Bo‘stonliq tumanining 23 ta mahalla fuqarolar yig‘inlarida boshlandi. Soliq organlari mutaxassislari dam oluvchilarga xizmat ko‘rsatadigan fuqarolarga soliq tajribasi maqsadi va mexanizmlari haqida tushuncha bermoqda.

Bu yerda to‘rtta soliq tayanch punkti mavjud bo‘lib, ularga qarorda ko‘rsatilgan va soliqqa tortilishi lozim bo‘lgan ko‘char hamda ko‘chmas mulk egalari to‘g‘ridan-to‘g‘ri murojaat qilishlari mumkin.

Hozirgi kunda orom.uz platformasida turizm xizmatlari iste’molchilari uchun foydali bo‘lgan qo‘shimcha ma’lumotlarga ega 3400 dan ortiq dam olish obyekti mavjud. Unda obyektning tavsifi, fotosuratlari, xarita bo‘yicha joylashuvi (geolokatsiya) va ijara narxi ko‘rsatiladi. 

Muhim! Agar sizdan saytda ko‘rsatilganidan farq qiladigan narxni to‘lashingizni so‘rashsa, taklif etilgan dala hovli yoxud boshqa obyektning fotosurati haqiqiy ko‘rinishiga mos kelmasa, 1198 qisqa raqamiga murojaat qiling.